"TEUBUKA AURAT"

Dari : Cek Dun Baroena

Sideh di laot, ribot ngoen bakat.
Sinoe di darat, ribot ngoen sinso.
Salam'alaikom, bak phon loen ucap.
Keu pada sahbat, saleum loen ato.

Tapula pade, hase ta harab.
Oh musem barat, takumiet tulo.
Nibak kali nyoe, rampoe loen surat.
Bacut nasehat, loen keunuek info

Aceh ka maju, timu ngoen barat.
Dum ala barat, jinoe cukop lo.
Agam ngoen dara, jibuka aurat.
Meunyan keuh sahbat, judul loen ato.

Reudoek ateuh gle, meuble-ble kilat.
Ujeun pih lebat, jitoeh meu hambo.
Haba loen seumoeng, keu inoeng batat.
Yang buka aurat,  jinoe cukop lo.

Di dalam efbi, peurati siat.
Si inoeng batat, jipasang fhoto.
Hana le male, oh wate jilhat.
Ngoen baje singkat, peuleumah baho.

Ule tan jitoep, saloep ngoen jelbab.
Hana teu ingat, meu oek jih krebo.
Ka hana jithe, gute meu sapat.
Ta eu siat-at, kapayah garo.

Pue lom oek sebeng, meu kuneng langsat.
Peureuseh kawat, di dalam travo.
Meunyoe lage nyan, hai intan batat.
Lage ibarat, agam deuh leubo.

Jinoe ka seureng, kayem ta lihat.
Baje paneuk that, peuleumah fhoto.
Pakek baje eh, yang lipeh singkat.
Selfi ju siat, adak lam kaso.

Ngoen gaya teuhing, tangieng hai sahbat.
Nyan gigoe kawat, ta eu meu ato.
Wate seumeugah, babah meujungkat.
Haba ji ucap, kateunte tilo.

Oh jak upeukan, pih sayang that that.
Soek baje keutat, ngoen leuwue amco.
Sampe gunoeng goeh, meu bungkoeh sep brat.
Ta tuoh takat, tarek ngoen keundo.

Wahe eo adoe, bek laloe sahbat.
Lam donya barat, piyoeh adoe eo.
Pateh hai adek, haba cek intat.
Jinoe ibadat, pubuet beulo-lo.

Bek le ta pamer, model sangkilat.
Bek le ta meukat, meunyoe nyan bieng fo.
Bek le peulikak, puncak nyan aurat.
Yoeh goh terlambat, ingat adoe eo.

Oh noe meumada, haba loen intat.
Meuah rayoek that, nyoe gasa tuto.
Karoeh meutuleh, bareh uloen lhat.
Maklum hai sahbat, karoeh teulanjo.

Wassalam..

Diposkan oleh : Zulfahmi Mustafa